Uchambuzi wa magazeti 10-01-2023

Lyrics

Uhakiki wa magazeti ya Tanzania yasemavyo leo- 10/01/2023

Mara baada ya Serikali ya Tanzania kutangaza Elimu bure, wanafunzi wamezidi kufurika katika Shule mbalimbali mara baada ya shule hizo kufunguliwa Januari 9. Serikali imejizatiti na ongezeko Hilo la wanafunzi na kutarajiwa kuanza ujenzi wa madarasa mapya 8000 yatakayopunguza Kero ya msongamano wa wanafunzi huku baadhi ya wazazi wakikubali kuchangia fedha kwa ajili ya chakula Cha watoto wakiwa shuleni. (Mwananchi)

Mara baada ya shule kufunguliwa siku ya tarehe 9/1/2023 baadhi ya wazazi wamelalamikia suala la watoto wao kurudishwa nyumbani mara baada ya kukosa fedha kwa ajili ya michango mbalimbali ya shule ikiwemo chakula. Waziri wa Elimu Sayansi na Teknolojia Adolph Mkenda ameingilia kati suala Hilo na kutoa kauli ya kuzuia tabia hiyo na kuwataka watoto wote wafike shuleni kwa ajili ya kuendelea na masomo. (Nipashe)
View more
Waziri wa nchi ofisi ya Rais, Tawala za mikoa na serikali za mitaa (TAMISEMI) Angellah Kairuki amesema Serikali ya Tanzania imedhamiria kuanzisha mpango wa uboreshaji wa elimu ya awali, msingi pamoja na Sekondari ambapo Trilioni 1.15 zimetengwa kwa ajili ya ukarabati na ujenzi wa shule za msingi kupitia mradi wa BOOST. Kwa upande wa shule za sekondari kila Halmashauri itapatiwa kiasi cha Shilingi milioni 600 kwa ajili ya shule moja ya sekondari na ujenzi huo unatarajiwa kuanza mwezi huu wa Januari pamoja na Februari. (Habari leo)

Alexander Mnyeti ambaye alikuwa mkuu wa mkoa wa Manyara ametakiwa kuwasili katika mahakama ya Hakimu mkazi mkoa wa Tabora kutokana na tuhuma za matumizi mabaya ya madaraka pamoja na kujihususha na Ujangili. Katika wito huo wa mahakama Mnyeti anatakiwa kuwasili na washtakiwa wengine wawili akiwemo Belinda Sumari ambaye ni Afisa mtendaji wa kata, pamoja na Bwana Al Amry akiwa mshtakiwa wa tatu mnamo Februari 7, 2023 (Jamhuri)

Reli ya kisasa ya SGR inatarajiwa kuongeza kasi ya biashara kwa nchi washirika wa Afrika Mashariki baada ya kukamilika kwake. Reli hiyo ambayo inatarajiwa kuunganisha nchi za Tanzania, Rwanda, Burundi, Congo DRC, Kenya, Uganda pamoja na Sudani ya Kusini itatumika kusafirisha bidhaa pamoja na malighafi ambapo usafirishaji huo utatumia muda mchache ukilinganisha na usafirishaji wa ardhini. Naibu waziri wa uwekezaji, biashara pamoja na viwanja nchini Tanzania Exaud Kigahe alisema ya kuwa mbali na kukuza biashara na shughuli za kiuchumi SGR itasaidia Tanzania kutumia kimkakati fursa za kiuchumi katika ukanda huu na katika eneo la biashara huria la bara la Afrika. (The Citizen)