Diamond ‘Unachezaje’, Anjella ‘Toroka’ na Nyimbo Zingine Zilizoachiwa Tanzania Wiki Hii
20 December 2021
[Picha: Beka]
Mwandishi: Charles Maganga
Pata Habari za Muziki na Mixtapes Bure Kwenye Telegram
Tukiwa tunaelekea mwishoni kabisa mwa mwaka wasanii mbalimbali wameendelea kuachia ngoma tofauti tofauti ambazo zimezidi kusherehesha kipindi hiki cha mwaka ambacho watu wengi wako kwenye mapumziko. Zifuatazo ni ngoma tano mpya kutoka kwa wasanii wa nchini Tanzania ambazo zimetoka wiki hii.
Unachezaje - Diamond Platnumz
Mdundo mkali kutoka kwa S2kizzy umefanya ngoma hii ya ‘Unachezaje’ iwe bora sana na kupata watazamaji wengi YouTube ndani ya muda mfupi. Kufikia sasa video ya ngoma hii imeshatazamwa mara Milioni 1.8 kwenye mtandao huo.
Soma Pia: Diamond ‘Unachezaje’, Harmonize ‘Utamu Remix’ na Ngoma Zingine Zinazotamba Bongo Wiki Hii
Toroka - Anjella ft Harmonize
Baada ya ngoma kama ‘Kama’ na ‘All Night’ kufanya vizuri, Anjella ameachia collabo yake ya tatu na Harmonize ya kuitwa ‘Toroka’. Ngoma hii ina mahadhi ya Amapiano na ndani yake Anjella na Harmonize wanasherekea na kuwahasa watu kufurahia maisha.
Vitamu - Platform ft Ruby
Baada ya ngoma yao ya ‘Katu’ kufanya vizuri, Platform pamoja na Ruby wamerudi tena na mkwaju wao mpya unaoitwa ‘Vitamu’. ‘Vitamu’ ni wimbo ambao ndani yake wasanii hawa wanasifiana kwa mahaba na mapenzi motomoto wanayopeana.
Umeniteka - Christian Bella
Kama upo kwenye penzi zito na mwandani wako na unahisi kabisa umetekwa kihisia, basi wiki hii Christian Bella ametoa ngoma kwa ajili yako ya kuitwa ‘Umeniteka’. Hii ni ngoma ambayo inaashiria ujio mpya wa Christian Bella baada ya kuwa kimya kwa muda mrefu kwenye muziki.
Marry You - Barakah The Prince
Kwenye ngoma hii Barakah anakiri hisia alizonazo kwa mwanamke ampendaye huku akitumia maneno mazuri pamoja na kipaji chake cha sauti kutimiza hilo. Kufikia sasa, video ya ngoma hiyo ambayo imeongozwa na Adam Juma imeshatazamwa mara thelathini na moja elfu kwenye mtandao wa YouTube.
Leave your comment