Nyimbo Mpya: Zuchu 'Love', Alikiba 'Asali' Na Ngoma Zingine Mpya Tanzania Wiki Hii
3 October 2022
[Picha: Instagram]
Mwandishi: Charles Maganga
Pata Habari za Muziki na Mixtapes Kwenye Telegram
Kama kuna wiki ndani ya mwaka 2022 ambayo wasanii kutoka Tanzania wameweza kunogesha kiwanda cha Bongo Fleva kwa kuachia ngoma kali basi bila shaka ni wiki hii. Kuanzia kwa Zuchu mpaka kwa Ali Kiba bila shaka hii ni wiki ambayo muziki mzuri umeweza kutawala.
Zifuatazo ni ngoma kali kutoka kwa wasanii wa Tanzania wiki hii :
Love - Zuchu
Hatimaye Zuchu ameachia ngoma ya "Love" ambayo amemshirikisha msanii kutokea Nigeria, Adekunle Gold. Love ni ngoma nzuri ya mapenzi ambayo Zuchu anadhihirisha ni kwa kiasi gani anataka mahaba kutoka kwa mwandani wake.
Suluhu - Lady Jaydee
Wiki hii Lady Jaydee alikata kiu ya muziki ya mashabiki zake kwa kuachia Suluhu, ngoma ambayo ndani yake Lady Jaydee anamsifia Rais wa Tanzania Samia Suluhu Hassan na kumsihi kuwa azidi kuunganisha taifa la Tanzania kuwa kitu kimoja.
Tile & Asali - Ali Kiba
Baada ta ukimya wa takriban miezi 11 Ali Kiba wiki hii aliachia ngoma mbili ambazo ni Tile na Asali.
Tile ni ngoma ambayo Ali Kiba anaeleza ni kwa namna gani anataka mpenzi wake wa zamani amrudie, ambapo kupitia sauti yake nzuri, Ali Kiba ameweza kufikisha ujumbe huo.
Asali kwa upande mwingine ni ngoma nzuri ya Mapenzi ambayo ndani yake Ali Kiba anahadithia kwa undani jinsi ambavyo mapenzi ni kitu kizuri kiasi cha kufananishwa na asali.
Msodoki Young Killer (Albamu) - Young Killer Msodoki
Wiki hii Young Killer ameachia albamu yake ya kwanza tangu aanze muziki ya kuitwa "Msodoki Young Killer" albamu yenye ngoma 15 na ambayo ndani yake Young Killer ameshirikisha wasanii tofauti tofauti ikiwemo Mr Blue, Dreygon, Country Wizzy, Nikki Mbishi na Maarifa.
Leave Me Alone - Harmonize Ft Abigail Chams
Akiwa na msanii Abigail Chams kutoka Rockstar Africa, Harmonize alipamba wiki hii na Leave Me Alone, mkwaju ambao umepokelewa vizuri sana na mashabiki hasa kutokana na ujumbe mzuri pamoja na muingiliano mzuri wa sauti baina ya Harmonize na Abigail Chams.
Vacation - Ommy Dimpoz
Kama unataka uende likizo ukiwa na mwandani wako, basi wiki hii Ommy Dimpoz ameachia Vacation ngoma ambayo ina lengo la kuwasindikiza wapenzi pindi wanapokuwa likizo. Ndani ya muda mfupi Vacation imekuwa ni ngoma pendwa baina ya mashabiki.
Marry Me ( Video) - Barnaba Classic Ft Marioo
Kutoka kwenye albamu ya Love Sounds Different, wiki hii Barnaba Classic ameachia video ya Marry Me akiwa na Marioo. Video ya Marry Me imeongozwa na Hanscana na tangu kuachiwa kwake imepokelewa vyema na mashabiki.
Leave your comment