Nyimbo Tano Bora za Amapiano Zilizoachiwa na Wasanii Kutoka Bongo
27 July 2021
[Picha: Citi Muzik]
Mwandishi: Charles Maganga
Pata Habari za Muziki na Mixtapes Bure Kwenye Telegram
Habari ya mjini sasa hivi ni muziki wa Amapiano. muziki huu ni wenye asili ya Afrika Kusini na ulianza kupata umaarufu mwaka 2012 na kutokana na umaarufu wake, majarida mbalimbali ya muziki duniani kama Billboard na Rolling Stone yamesifu sana muziki huu.
Soma Pia: Nyimbo Mpya: Video Tano 5 Zinazotamba YouTube Tanzania Wiki Hii
Nchini Tanzania pia mambo yamekuwa sukari sana kwani wasanii mbalimbali wametengeneza nyimbo zenye mahadhi ya Amapiano ili waweze kwenda sambamba na dunia inavyotaka.
Makala hii inaangazia nyimbo 5 kali za Amapiano kutoka kwa wasanii watanzania
Mama Amina - Marioo ft Sho Madjozi & Bentley Smith
Ili kuweza kukidhi haja za mashabiki zake Marioo ilibidi asafiri mpaka Afrika kusini ili kutengeneza ‘Mama Amina’ na bila shaka safari yake ilizaa matunda kwani wimbo huu ulipendwa sana watu wa rika zote na ulikaa kwenye nafasi za juu kwenye chati mbalimbali za muziki hapa nchini Tanzania.
Soma Pia: Diamond Avimba Baada ya Wimbo wake 'Iyo' Kuvuma Afrika Kusini
Sandakalawe - Harmonize
Harmonize aliweka tabasamu kwa mashabiki wa muziki wake baada ya kuachia wimbo wa ‘Sandakalawe’ Juni 25 mwaka huu. Kwa Harmonize hakuitaji kwenda Afrika Kusini kukamilisha wimbo kwani ‘Sandakalawe’ ilitayarishwa na nguli wa muziki kutokea Tanzania Daxo Chali huku maandalizi ya mwisho yakifanywa, na Young Kiz Morento. Harmonize aliweka wazi kuwa yeye haoni shida kufanya muziki wa Amapiano kwani ni muziki wa kawaida na unawapa watu burudani.
Iyo - Diamond Platnumz ft Focalistic, Mapara A Jazz & Ntoshi Gazi
Wiki kadhaa zilizopita, Diamond Platnumz aliamua kuonesha kuwa hamna aina ya muziki ambao hawezi kufanya kwa kuachia ‘Iyo’. Kwenye ‘Iyo’, Diamond Platnumz anarudisha watu vilabuni na sehemu za starehe kwani wimbo wote una mahadhi ya kuchezeka. Kufikia sasa, bado video rasmi ya wimbo huu haijatoka lakini inatarajiwa kuachiwa hivi karibuni.
Amapiano - Baba Levo
Baba Levo anaingia kwenye orodha ya wasanii kutoka Tanzania waliofanya ‘Amapiano’. Kwenye wimbo huu, Baba Levo ameshirikiana na mtayarishaji muziki aitwaye cBob Junior huku maandalizi ya mwisho yakiwa yamefanywa na Mocco Genius. Ukiachana na uchangamfu pamoja na mashairi mujarab ya wimbo huu, video ya ‘Amapiano’ imenakishwa na miondoko mbalimbali ya dansi ambayo huvutia kuangalia.
Mapopo - Damian Soul ft Nhlonipho
Imepita takriban miezi 7 tangu Damian Soul atoe ‘Mapopo’ lakini kila mara wimbo huu ukipigwa kwenye sherehe au hafla fulani bila hiyana watu husimama na kucheza. Kwenye ‘Mapopo’, Damian anatumia mdundo wa Amapiano akichanganya na baadhi ya maneno ya kiarabu ili kunogesha wimbo huo ambao ametunga na kuandika yeye mwenyewe.
Leave your comment