Video 5 Zilizo na Watazamaji Wengi Zaidi YouTube Tanzania
21 July 2021
[Picha: YouTube]
Mwandishi: Charles Maganga
Pata Habari za Muziki na Mixtapes Bure Kwenye Telegram
Wasanii wa Tanzania hutegema sana mtandao wa YouTube kama kimbilio lao linapokuja suala la kuweka kazi zao hasa video za muziki. Utamaduni huu ulianza mwanzoni mwa miaka ya 2010 pale ambapo mtandao wa YouTube ulianza kuwa maarufu hapa Tanzania.
Soma Pia: Nyimbo Mpya: Diamond Aachia ‘Iyo’ Akiwashirikisha Focalistic, Mapara A Jazz na Ntoshi Gazz
Makala hii inaangazia video tano za muziki kutoka Tanzania ambazo zimetazamwa sana kwenye mtandao wa YouTube kwa muda wote.
Soma Pia: Harmonize Awapongeza Nandy, Hamisa Mobetto na Anjella Kwa Kuachia Ngoma Zinazovuma
Yope remix - Innos B ft Diamond Platnumz
Video ya wimbo huu ilitoka Septemba 7 mwaka 2019 na kufikia sasa imetazamwa mara Milioni mia moja hamsini na tisa. Hii ndio video pekee iliyofanywa na msanii wa kitanzania ambayo imevuka watazamaji Milioni 100 kwenye mtandao wa Youtube.
Inama - Diamond Platnumz ft Fally Ipupa
Muunganiko wa Afro-Congo na Bongo Flava ulifanya video ya ‘Inama’ iweze kunoga sana. Video hii iliachiwa rasmi Juni 9 mwaka 2019 na kufikia sasa imeshatazamwa mara Milioni tisini na tatu kwenye mtandao wa YouTube.
Kwangwaru - Harmonize ft Diamond Platnumz
Video ya ‘Kwangwaru’ ilitoka April 14 mwaka 2018. Harmonize aliweka wazi kuwa ‘Kwangwaru’ ilikuwa na lengo la kuonesha kuwa muziki wa Bongo Fleva unaweza ukafanya vizuri hata kwenye kumbi za starehe kama klabu. Kufikia sasa video hii imeshatazamwa takriban mara Milioni themanini na tatu.
Waah - Diamond ft Koffi Olomide
Novemba 30 mwaka 2020 ndio wimbo huu ulitoka na video yake alifanya Director Kenny kutokea Zoom Extra. Video hii iliweza kuvunja rekodi tofauti tofauti kama kufikisha watazamaji milioni 1 ndani ya saa nane na kufikisha watazamaji milioni 10 ndani ya siku saba na kufikia sasa video imetazamwa takriban mara Milioni sabini na saba kwenye mtandao wa YouTube.
Nana - Diamond Platnumz ft Mr Flavor
Mwaka 2015 Mei 29 ndio siku ambayo Diamond Platnumz alitoa video ya wimbo wa Nana akimshirikisha Flavour kutokea nchini Nigeria. Wimbo huu ulipata mafanikio makubwa kiasi cha kumfanya Diamond Platnumz kuitwa kutumbuiza kwenye tuzo za MTV Africa Music Awards Durban Afrika Kusini. Kufikia sasa, video ya wimbo huu iliyoongozwa na Godfather Productions kutokea Afrika kusini imetazamwa mara Milioni sabini nne kwenye mtandao wa YouTube.
Leave your comment